ஒரு காத்திருப்பு .... அந்த நிமிடங்களுக்காக....

பார்த்து விட்டுப்
போன நாள் முதல்
பகலிலும்
கனவில் மிதக்கிறேன்....

'பார்க்கலாம்'
என்ற வார்த்தையில்
பரிதவித்துக்
கொண்டிருக்கிறேன்....

தம்பி குடை பிடிக்க
தங்கை ஆலம் எடுக்க
நாயகனாய் நீ நடக்க
நாணம்வந்து எனைத் தடுக்க

நிச்சயம் முடிந்தது - நெஞ்சில்
பட்சியும் பறந்தது....
மிச்சமுள்ள நேரம் மட்டும்
கட்சித் தாவல் செய்யுது....

விடியும், பொழுதும் புலரும்,
காலை மெல்ல மலரும்,
வாழும் காலம் முழுதும்,
காதல் நெஞ்சைத் தழுவும்...

மாதிவள் கழுத்தில்
மங்கள நானேறும் - என்
மானம், கற்பு அனைத்தும்
மன்னவா....
உனக்கே என்றாகும்...

இருக்கிறேன்,
கண்ணில்
கனவு மறந்து
தூக்கம் துறந்து
காத்திருக்கிறேன்....
கணவா...
அந்த
ஆனந்த நிமிடத்துக்காக....

Disclaimer:
This website and its content is copyright of Uma Manoraj - © [2010].
All rights reserved.